فاكرين المسرحية دي ؟!
المسرحية دي بتيجي على بالي اول ما بسمع تصريحات اي حد من المسئولين او اي بيان بتطلعه الحكومة
بيفكروني بمحمد صبحي لما يقول
انا نفسي اعرف هما المسؤلين دول مبيزهقوش من كتر التصريحات !!!!
كل يوم تصريح جديد ... وكلام جديد
وطبعا مفيش اي تنفيذ فعلي لكلامهم ده
انا مش فاهمة ليه غاويين يدوا الناس امل ويعيشوهم في احلام ان حياتهم هتتحسن
انا ببقى ماشية في الشارع بحس ان الناس معادتش طايقة بعض
بحس ان كل واحد ماشي بيغلي ما بيصدق انه يطلعه اللي جواه في اي حد قدامه حتى لو ملوش علاقة بالموضوع
اعتقد ان ده نتيجة للحالة اللي الناس عايشينها المرتبات مش مكفية حاجة
والشباب مش لاقي شغل
والمسؤلين فالحين بس انهم يدونا في تصريحات
وبعد كده يطلعوا تصريحات جديدة تلغي التصريحات الاولانية
وفالحين بس يطلعوا في التليفزيون ونتيجة للمناخ الديمقراطي الذي يسود البلاد في العصر الجميل المزهزه الحالي
الناس مبسوطة وحالتها تمام وزي الفل!!
بيفكروني بمحمد صبحي ف المسرحية لما يقول:
من اجلكم .. ومن اجل تحقيق الديمقراطية في البلاد
مادة واحد : اعلان سيادة الديكتاتورية في البلاد
.................
مادة تلاتة : مدة الحكم عشرين سنة وبقولها من دلوقتي مش هجدد!!؟
..................
والديكتاتورية يا اخواني هي حكم الفرد المستنير
اللي هو انا !!!
للجماهير الشعبية
اللي هي انتوا !!
بطريقة حلوة
اللي هي اييييه....؟؟؟؟
المهلبية
ايوة!!!!
على فكرة انا مش بنتقد الحكومة لمجرد الانتقاد هي فعلا ساعات بتعمل حاجات كويسة بس معتقدش انهم بيمشوا بطريقة عمر ابن الخطاب
اللي ما معناها " لو دابة تعثرت في العراق لسئل عمر عنها "
اعتقد في ناس كتير قاعدة تتعثر وتقع ومش لاقية تاكل
محتاجين اكتر من التصريحات
محتاجين حياة مش شرط تكون كريمة
بس عالاقل تكفيهم ذل السؤال
انا عارفة اني طولت عليكوا بس بجد انا دمي محروق
):
واجدع سلام للمهلبية
